بالاش آذراوغلو آدی ایله تانینان بالاش آبی زاده آذربایجانین تانینمیش و آدلیم شاعیرلریندندیر. ۱۹۲۱ م. (۱۳۰۰ گ.) ایلینده باکی شهرینده دونیایا گلدی. ۱۶ یاشی اولاراق اردبیل شهرینه گلدی. ۱۳۲۵-جی ایل میلّی حوکومتین سوقوطوندان سونرا باکی شهرینه قاییدیب فیلولوژی ریشته سینده تحصیلین قورتاردیر. ۲۰۱۱-جی ایلده شاعیر دونیاسین دَییشدی.[۱] ۱۳۲۱-جی ایلده حزب توده ایراندا عضو اولدو. بالاش آذراوغلو ۱۳۲۲-جی ایلده اردبیلده قورولان 'ضدفاشیست جمعیتی‌نین' قوروجولاریندان اولاراق جمعیتین یایدیغی 'ضدفاشیست' آدیندا هفته لیگی ۱۳۲۴-جو ایلیین مئی آیینا قدر رداکته ائدیردی. ۱۳۲۵-جی ایلده گرمی بؤلگه‌سیندن میلّی مجلیسه نماینده سئچیلدی. ۱۳۲۵-جی ایلده تهران شهرینده ایران یازیچیلارینین بیرینجی قورولتاییندا جنوبی آذربایجان شاعیرلری طرفیندن ایشتیراک ائتمیشدیر. ۱۳۲۸-جی ایلدن شاعیر آذربایجان یازیچیلار جمیعیتی‌نین صدری سئچیلمیشدیر
بالاش آذراوغلونون ایلک شعری غربه گونش دوغرو باشلیغی ایله تبریز شهرینده یاییلان وطن یولوندا روزنامه سینده یاییلمیشدی. شاعیر ضدفاشیست و جودت کیمی درگیلرین رداکتورو اولموشدور. بو درگیلردن علاوه آذربایجان، ینی شرق، شفق، دموکرات درگیلرینده ده شعرلرین یاییردی.
یاییلان کیتابلاری
شعرلر
منیم گونشیم
ساوالان
وطن تورپاغیندا
مبارزه ایللری
حافظین قبری اوسته
منیم نغمه لریم
سحر شفقلری
روس دیلینده ده ایکی کیتابی چاپ اولونموشدور.
آنادیلی آدلی بیر شعری
بیرگون اسیر دوشموش بیر قهرمانی
سورغویا، سؤالا چکنده جللاد
سیزین الینیزده اؤلمرم دئدی -
منی زامان- زامان یاشادار حیات...
دئدیلر: گؤزونو اویاریق سنین،
گؤره بیلمزسن
دئدی: یاشارام
دئدیلر: قولونو قیراریق سنین،
سیلاحین، کسرین دوشر الیندن
دئدی: یاشارام
دئدیلر: قیچینا کونده ووراریق،
گزه بیلمزسن
باشیندا ائله بیر تونقال قوراریق
دؤزه بیلمزسن
دئدی: یاشارام
دئدیلر: نه یین وار آپاراریق بیز،
بیرده کئچمیشینه دؤنه بیلمزسن
دئدی: یاشارام!
دئدیلر: دیلینی قوپاراریق بیز،
.دانیشا بیلمزسن، دینه بیلمزسن
سوسدو قهرمان،
نه یاشارام دئدی،
نه اؤللم دئدی.
سؤیله دی: نه بیلسن ائله، ای جلاد!
دوران سنیندیر،
دیوان سنیندیر...
بالاش رومانلاردا
بالاش، اردبیللی یازیچی، محمدرضا بایرامی نین یاشیل باغین اؤلولری آدلی رومانیندا، شخصیتلریندن بیریسی دیر.
قایناقلار
کاظم نظری بقا (۱ ارديبهشت ۱۳۹۲). بالاش آبی زاده (آذراوغلو) (فارسجا). شعرانه. یوخلانیلیب ۵ اوکتوبر ۲۰۱۵.
بالاش آذراوغلو – حمید محمدزاده. جنوبی آذربایجان یازیچیلارینین ادبی مجموعه سی (تورکجه). آذربایجان روزنامه سی نین نشریه سی, ۳۷۰.
